JD (U)-i akokba tashi agi ni yaritsü ta shiogo: Sharmila

Imphal, August 10 (Agencies): Meimchir temeten atema rarar Manipur tsür, Irom Chanu Sharmila-i Armed Forces Special Powers Act (AFSPA) ozüng agientsü atema küm 16 tashi lumia aruba sülen yashi tembangogo aser tanü lai, Janata Dal United (JDU) nung medenaka parnoki akokba ajak agi yaritsü ta shiogo, ta metetdaktsü.
Imphal nung aliba Jawaharlal Nehru Institute of Medical Sciences hospital nung osangbenertem den jembidang Sharmila-i, ozüng tesashi AFSPA agientsü atema lai yimtenren nung ajemoka tashii arutsü tebilemba lir, ta ashi.
“Kü nükjidong ataloktsü atema tamasa kü dak tashi alitsü nüngdak. Sangdong agütsütsü atema ano mapang lir. JD (U) nung medenaka parnoki ni akokba tashi agi yaritsü ta shiogo,” ta lai ashi.
La lumiba anena yimtenren nung ajemoktsü ta sangdongba sülen nüburtemi la aitsüba dak sentakba nung Irom-i, nüburtemi la junga mangatet, ta ashi.
“Parnoki ni jungjunga mangatet. Kü mulungjang mengui parnoki parnok tebilemba jembir,” ta laisa ashi.
Tamalen Janata Dal-United (JD-U)-i, lai rarabaji Mahatma Gandhi tangatetba shilem ka lir aser la ya tashitait nisung ka, ta jembia lir.
Mongolbarnü Sharmila-i la lumiba tembangba sülen lai, Manipur nübur tenzüktsü atema lai Chief minister kümner, ta metetdaktsü.
Laisa, nüburtemi kü dang ‘Iron Lady’ of Manipur ta jaogo aser iba amaji taküm liner, ta ashi.
“Tanü nungi ni lumiba tembangogo. Ni yimtenren nung ajemokner aser kü dang Iron lady of Manipur ta ajaba ama ni kü taküm yamaji litetner,” ta lai ashi.