JD (U)-i Nagaland nunga NRC yangludaktsünür

Dimapur, Luroi (August) 1 (TYO): Supreme Court ketdangsüba kübok National Register of Citizens indang final draft nung nisung 40,07,707 tashi madenba indang onük Janata Dal, (United), Nagaland-i taruba Peoples Democratic Alliance (PDA) senden nung benoka olemteptsü, ta Media Cell sangdong ka nung metetdaktsü.
Nagaland nunga NRC mapa inyaktsü aser cut-off year ji December 1, 1963 asütsü atema onoki tebilemba benoktsü. Küm aika tejaklen Naga Students’ Federation (NSF)-i iba mesükba electoral revision maparen ka inyakogo saka onük aika ajanga iba mapa tembanga meinyaktet. Ajisüaka, parnoki iba khuret atema mapa tetenzüktet aser kümdangtsü osang ka sangoktsüogo, ta JD (U) Nagaland-i metetdaktsü.
Nisung mesüra telok shingaia Naga nunger aser December 1, 1963 matongdang arua alir non-Naga nunger indang temeten tim mesüi mamshitsüla. Nagaland nung aliba indigenous inhabitants-i tangar nem asen temeten majemshidaktsütsüla, ta JD (U) Nagaland-isa ayongzük.