JD (U)-i Sharad Yadav Parliamentary Party lenir menden nungi anentsü

Patna, August 12 (Agencies): JD-U-i party lenir, Sharad Yadav Parliamentary party lenir nungi anentsütsü telemtetba agiba sülen Honibarnü pai JD-U Tir aser Bihar Chief Minister, Nitish Kumar aija, “Party ya Kumar kija meyong masü saka pa meyonga lir,” ta ashi.
Bihar, Madhepura district nung osangbenertem den jembidang Yadav-i Nitish Kumar-i JD-U, RJD aser Congress teloktep toktsür BJP den longjema sorkar tasen akumba atema mepelaba lemsatep.
Yadav-i, “Bihar nung JD-U ana lir, kaji official party aser kaji nüburtem indang party lir. Sorkar den aliba MLA aser lenir ajakji nija tajangzük angutsü atema Nitish Kumar den lir, ajisüaka kü den aliba MLA aser lenirtem ajakji nüburtem den lir,” ta ashi.
JD-U-i Parliamentary party lenir melentsü atema telemtetba agiba dak sendakba nungbo pai kecha melemsatep.
Rajya Sabha MP, Yadav-i, “Ni Indira Gandhi-a metsübo, anungji tangartemjibo ni mesükshir,” ta ashi.
“Ochi jembitsü aser tangatetba nung shidak nokdaktsü atemabo ni shinga metsübur,” ta paisa ashi.
Sharad Yadav-isa pa maneni ‘Mahagathbandhan’ teloktep nung lir, aser iba teloktep ya, küm pongu yimsüsütsü atema 2015 küm Bihar assembly election nung nisung crore 11-i shimba teloktep lir, ta metetdaktsü.
“BJP den longjemer Bihar nung sorkar akumbaji 2015 assembly election nung nüburtemi aginüba masü,” ta paisa ashi.
“Küm pongu yimsüsütsü atema nüburtemi RJD, JD-U aser Congress teloktep nem vote agütsü, aser ibaji, nüburtemi BJP-i aniba NDA teloktep anema vote agütsüba liasü,” ta paisa shisem.