JD(U)-i Bihar CM Nitish party nungi jendoktsü

Patna, August 10 (Agencies): Tang JD(U) nung mepetmesü adoka lir, aser party lenirtemi Bihar Chief Minister Nitish Kumar-i BJP den loktepba atema pa party nungi jendoktsü atema jembidar, ta osang ka ajanga metetdaktsü.
Bihar nung JD(U), RJD aser Congress teloktep nungi Nitish Kumar-i pilaba atema JD(U) lenir, Sharad Yadav leniba nung Nitish Kumar dang mepelar züngsemtem ka küma longjemdar, ta osang angazüker.
Bihar nung teloktep raksaba dak sendakba nung tanü Yadav-i, iba tatalokba ajanga state nung senso crore 11 tamang raksatsüogo, ta ashi.
“Kumar-i pa kijai telemtetba agia teloktep raksaba ajanga 2015 küm assembly election nung takok anguba jenjang raksatsür. State unit Tir 12-i iba telemtetba aitsüogo. Onoki legal aser temzüng nung ajemdaker pa party nungi jendoktsü atema inyaktsü,” ta taoba mapang party general secretary, Arun Srivastava-i metetdaktsü.
Yadav den lenirtemi, Bihar Chief Minister-i tashi arishir, aser ibayongji pai party tangatetbatem anema inyakogo, ta aitsü.