JD(U)-i Minister Kaito Aye nem tenüngsang agütsü

Kohima, Metsüremi (March) 27 (TYO): Janata Dal (United) Nagaland unit-i tanü G Kaito Aye nem tenüngsang agütsüba sentong ka agi. Tsüklai (February) 27 nü election nung takok anguba den PDA sorkar indang Council of Minister pa züngsemba atema parnoki tenüngsang agütsü.
Sentong nung o jembidang Minister Aye-i pa nem Agriculture aser Cooperation department tem lemzüktgsü aser iba asoshi pa aluyimertem asoshi inyakba minister ka asütsü ta ashi.
Aluyimba tsütsü terenlok bener arutsü aser ibaji ajanga state indang rongsenkettsüng jenjang ajungkettsü ta Aye-isa nangzük.
PDA sorkari agri aser allied sector nung temulung agütsütsü aser aluyimertemi nüngdakba teyaritem agütsütsü, ta paisa shisem.
Pai JD(U) mesüra Sathakha A/C atema dang masü saka state ajunga renloktsü atema minister ka ama mapa inyaktsü ta Aye-isa metetdaktsü.
JD(U)-i election magidang NPF den tesentaktep ayuba pilar NDPP den yaritepa sorkar akümba atema Kaito Aye-i ashiba agi, “Centre nung NDA teloktep nung ajemdaker aser yimjung o terenlok bener arutsü atema sorkar takang ka alitsüsa ta asüba tangatetba nung iba telemtetba ya agi.”
Pa Patna-i aotsü aser Bihar Chief Minister & JD (U) national president Nitish Kumar den ajurutepa JD(U) Nagaland unit atema onüktem jembitsü ta Aye-isa shisem.
Sentong nung JD (U) Nagaland state unit president NSN Lotha-i o jembidang, party-i Indo-Naga yimten ken o latettsü atema yariteptsü aser Prime Minister Narendra Modi lenisüba kübok Naga yimten tekaraba nung latettsü imlar ta ashi.
Tawa election nung tamakok anguba JD (U) candidate tem- L. Temjen Jamir, 21 A/C, Ramongo Jami, 39 A/C, N. Aphao Konyak, 43 A/C, H. Mukam, 58 A/C aser Yangseo Sangtam, 60 A/C nungertemia iba sentong nung o jembi.
Sentong nung mendenji JD(U) Nagaland general secretary Kitoho S Totokha liasü, JD(U) Chairman Y Mhonbemo Humtsoe-i tesentepertem pela agizük aser State Secretary Thangliba Sangtam-i anküp tepela o jembi.