JD(U)-i Nagaland renlokdaktsütsü: NSN Lotha

Kohima, Tsüklai 8 (TYO): Nagaland jenjang melenshitsü aser terenlok alitsü atema Janata Dal (United)-i nem vote agüjang ta tanü parnoki ayongzük.
JD(U)-i tanü Nagaland Assembly Election manifesto sayaba nung iba temepishiba zülua lir aser ibaji State Unit President Senchumo NSN Lotha-i sayaa liasü.
Iba sentong nung JD(U) National General Secretary Afaque A. Khan, National Executive Member Aneel Hegde aser State Executive Member Kitoho S. Rotokha nungertem aden.
Tsüklai 27 election nung JD(U)-i shinga dena tesentaktep melii dang toketptsü.
“13 buba NLA election nung Janata Dal (U)-i ‘Development With Justice’ omen nung ajemdaker tokteptsü” ta tanü NSN Lotha-i ashi.
Parnoki education system nung temulung agütsütsü aser iba asoshi sorkar school tem ajungkettsü ta ashia.
JD(U) nem sorkar akümtsü tashi agütsüra school, college aser university nung mathematics nung kaketshir tajungtem nem special scholarships agütsütsü, state adena orr azüngba kaketshirtem nem insurance scheme tenzüktsütsü aser Education Commission reprangshitsü, ta JD(U) State Unit President-isa metetdaktsü.
Rural development ajanga yimtsüng jenjang nung tashi aser inyakyim benzüka agütsütsü aser small o medium industry tem lapoktsü atema lanurtem nem maongka agütsütsü. Non-Naga nungertem kibur ser lapokba shishilembabaren noktangtsü aser iba maongkaji Naga lanur nem agütsütsü, ta paisa metetdaktsü.
JD(U)-isa ozüng alema aruba bendangertem aser talisa Bangladesh nungi arurtem noktangtsü aser ibaji Bengal Eastern Frontier Regulation 1873 mapa küma inyakba ajanga noktangtsü ta nangzükogo.
1873 nung benshia aruba Inner Line Regulation meyipa reprangshimtsü aser Nagaland nung alirtemi aginüba ama nüngdakba temelenshitem asütsü, parnokisa ashi.
Gari lenmang aser health sector den ano Nagaland nungi Armed Forces Special Powers Act (AFSPA) agientsü atema inyaktsü, ta JD(U) manifesto nungsa shia lir.
Indo-Naga yimten ken o atema NSN Lotha-i ashiba agi “party-i teti Jayaprakash Narayan aser pai Naga nunger meimba tsüngsü sülen anidaktsü aser iba atema onoki Naga yimten tekaratiba nung latettsü atema inyakba mapa pusema nungittsü.”
Paisa nübortem dang JD(U) nem vote agütsütsü aser ibaji ajanga yimtsüngtem ajungkettsü aser Naga nunger teküpok jenjang nung alirtem ajungkettsü ta mepishia ashi.
JD(U)-i komaser sorkar akümtsü ta osangbeneri asüngdangdang “onoki party mashi ka den post-poll alliance alitsü mulunga lir saka parnoki onok indang election manifesto agizüktsüla” ta NSN Lotha-i langzü.