JD(U)-i NDA nung aden; Sharad-i party temaitsü temeten meshitsü

Patna, August 19 (Agencies): Honibarnü Nitish Kumar-i aniba Janata Dal (United) telok National Democratic Alliance (NDA) nung denogo, aser Sharad Yadav-i aniba JD(U) teloki Election Commission ajurua party temaitsü temeten meshitsü, ta osang angazüker.
JD(U) lenir, KC Tyagi-i, Chief Minister kidang National executive senden ka amendang BJP-i aniba NDA nung adentsü atema ajaki melungtepa agizüka liasü, ta metetdaktsü.
JD(U) lenirtemi ashiba agi, iba senden nungji MLA 70, Lok Sabha MP ana aser Rajya Sabha MP tenet dena liasü.
BJP Tir, Amit Shah-i JD(U) NDA nung adentsü atema JD(U) jaoka liasü, aser national executive-i ibaji agizük.
Kasa anogo nungsa taoba mapang party Tir, Sharad Yadav-i aniba telokia Election Commission ajurua party temaitsü ‘lasang’ temeten meshitsü lemteta liasü.
JD(U) lenir, Arun Srivastav-i, “Kobi melii onoki Election Commission ajurua party temaitsü, ‘lasang’ temeten meshitsü aser nüburtem, dang chichiba party ji Bihar Chief Minister Nitish Kumar-i aniba telok masü saka Sharad Yadav-i aniba telok lir ta sangdongtsü, ta metetdakja liasü.
Tyagi-isa, JD(U) national executive senden nung adentsü Sharad Yadav jaoker aser mangatettep onüktem angatettepttsü akok, ajisüaka pai Lalu Yadav-i ayongba sentong nungbo madentsüla. Pai yamaji inyakra onoki pa dak tamang makatsü. Party tenteter rongnung pa densema lir, anungji senden nungji pai pa tangatetbatem lemsateptsü akok,” ta metetdakja liasü.
Tanep Bihar CM ki anasa Nitish Kumar-i aniba JD(U) aser Sharad Yadav-i aniba JD(U) pusemertem tsüngda rara adoka liasü, ta police-i ashi.
Taoba ita July 26 nü Nitish Kumar-i Rashtriya Janata Dal (RJD) aser Congress den teloktep toktsüba sülen JDU(U) telok ana aküm.
Tan hopta tetenzüklen party-i lenir 21 jendok, aser parnok rongnung taoba mapang minister aser taoba MLA tem densema lir.
Taoba Bihar assembly election nung JD-U, RJD aser Congress longjemer BJP anema toktep aser parnoki takok ngua sorkar tenteta liasü.