JDU-i NDPP inyakyim aitsür

Dimapur, Chiteni/July 12 (TYO): NDPP puri sangdong ka ajanga JDU parnok den adenba sangdongba dak sendakba nung JDU office ajanga 26.06.2019 nü shiti ka agütsüba telangzüba manguba sülen NDPP anema JDU puri ken o benoktsü asoshi telemtetba agiogo, ta ketdangser sangdong ka ajanga metetdaktsü.
Parnokisa ashiba agi, NDPP lenirtem tsüngda mangatettep tuluka lir. NDPP tir den telephone ajanga jembiba mapang pai ashiba agi, NDPP indang sangdong nung aibelen ka liasü saka kasa mapang nung NDPP, Secretary General-i JDU General Secretary nem WhatsApp ajanga telangzüba agütsüba nungbo parnok ket nung merger documents kecha mali, ta shia lir.
NDPP yongtsü nung mangmangtepba ya democracy atema maaksü lir. Iba ya ajanga NDPP puri political party tem inyaksangshi züngshia maliba sayur. NDPP puri asaa tanga political party akhüm metsübui amokbangtsü merangba tasa benshiogo, ta Coordinator (Publicity and Program) Mohammad Nisar-i ashi.