JDU Nagaland-i Kaito Aye aser NDPP aitsür

Kohima, June 25 (TYO): G Kaito Aye-i Nationalist Democratic Progressive Party (NDPP) nung adenba aitsüba den külemi NDPP-i par MLA mesüzük ta Janata Dal United (JDU) Nagaland-i metetdaktsü.
Nagaland JDU Minister G Kaito Aye den ex-candidate kar NDPP nung adenba sülen anogo ka lir State JDU president Senchumo NSN Lotha-i osangbener dang ashiba agi “MLA Kaito G Aye aser JDU züngsem kar rongsen agi mesüzük.”
“Iba atema JDU Nagaland maoksar kechiyong yamai ataloktsü ta meteta dang liasü. Aye ya JDU ticket nungi takok angu saka pa kodanga party den maliasü. Aye-i BJP nung adentsü merang aser pai BJP General Secretary in-charge of Northeast, Ram Madhav den anaben tashi ajurutepogo” ta NSN Lotha-isa ashi.
“BJP-i pa pelashishia agizüktsü ta Aye-i bilem saka Madhav-i pa dang teloktep indang tangatetba akhümtsübutsü aser talisa JDU National President aser Bihar Chief Minister Nitish Kumar tezü metangdaktsütsü atema ashi” ta paisa shisem.
BJP nung medentetba sülen Aye-i JDU sasep nung party anema inyaktsü tenzük aser pai National President Nitish Kumar-i Citizenship Amendment Bill (CAB) 2016 anema noktakba anema mapa inyak. Paisa State Unit President aser General Secretary anema mapa inyak, ta NSN Lotha-isa metetdaktsü.
JDU lennirtemi Aye dang Nitish Kumar lenisüba kübok aser party tangatetba sülen anidaktsü ta ashi aser iba sülen pai party nung züngsem kar mesüzüktsü merang, ta paisa ashi.
Nitish Kumar lenisüba kübok JDU-i tema nungi dang NDA yaritsü lemtetba ajanga Aye tezü atang. NDA sorkar nung JDU-i Cabinet menden tajungtem angutsü aser iba ajanga pai Centre dang nungi senotsü ajangzüktsü ta imla liasü saka yamaji matalol. Iba jagi pai party toktsür aotsü molungtet, ta NSN Lotha-isa shisem.
JDU Nagaland akangakanga lir aser national president Nitish Kumar lenisüba kübok Nagaland nungi 3Cs- Crime, Corruption & Communalism agientsü merangtsü, ta JDU lennirisa ashi.
NDPP-i MLA tem mesüzüktsü meranger aser Lok Sabha election matongdang parnoki NPP MLA anaprong den NPF MLA tenet tashi mesüzük. JDU MLA ya party tasembuba mesüzükba lir, ta NSN Lotha-isa shisem.
NDPP-i par Party sorkar ka kümtettsü atema MLA tem mesüzükba mapa inyaker. NDPP-i tanga party tem nungi MLA 10 tashi mesüzüktetogo aser tang parnok MLA 29 lir. Joko par party indang sorkar ka akümtsü atema MLA ana dang nüngdaker. Parnoki maneni BJP MLA tem mesüzüktsü merangtsü anungji BJP kümdangtsüla, ta NSN Lotha-isa metetdaktsü.
“Tanga political party tem nungi MLA tem mesüzükba ya anemsü inyakyim ka lir. Aisüaka, NDPP sasep nung mepetmesü lir aser kobi melii ibaji temai adoktsü” ta paisa shisem.
Centre nung BJP aser JDU sendaktepa aliba agi onoki People’s Democratic Alliance (PDA) nung aden, anungji Nagaland nung BJP-i PDA nung aden tashi onoka adentsü, ta paisa metetdaktsü.