JD(U)-RJD CM candidate ji Nitish asütsü: Mulayam

New Delhi, June 08 (Agencies): Bihar Assembly election nung JD(U)-RJD teloktep nungi Chief Minister candidate ji Nitish Kumar asütsü, ta tanü Samajwadi Party tongti lenir Mulayam Singh Yadav-i ashi.
“Lalu Prasad aser Nitish Kumar na longjemba asoshi ni kanga pelar. Bihar nung chief minister candidate ji Kumar asütsü. Chiefminister candidate asoshi Lalu-i Nitish Kumar tenüng benoka liasü. Pai nübo yimtsütsü ta Lalu-i shiogo,” ta Mulayam-i tanü New Delhi nung osangbenertem senden ka nung metetdaktsü.
Assembly election nung lokteper tokteptsü asoshi party ana tsüngda telemtetba agiba sülen tanü Yadav-I osangbenertem senden ka nung iba osang ya sangdonga liasü. Tanü iba senden nung RJD Tir Lalu Prasad aser JD(U) tongti lenir Sharad Yadav nata densema liasü.
Ano Lalu-ia, pai election nung metokteptettsü aser pa kibong mesüra par party nungi Chief minister candidate asütsüsa lenir mali, ta ashi.
“Küna (pa aser Kumar) tsüngda tebendang kechamali,” ta Lalu-i ashi.
Mapang ka nung tsükchitepa alisang ana longjemba ya Janata Parivar (party trok teloktep) ajanga südi ta bilemer.
Lalu-isa, “Ni miim ajak achitsü renema lir. Aji süaka onok longjemer communalism ya raksatsütsü. Onoki BJP ya Bihar nungi aridoktsü,” ta ashi.
“Nitish küna ya kibong ka nungi dang lir. Küna tsüngda tepila liasü aser raratepa aruogo, iba den külemi kati ka aitsütepa aruogo.Aji oda süaka Bihar nung Rajya Sabha menden asoshi election mapang JD-U nung telemsa adoker liasü, aser iba yongji BJP nokdangtsü asoshi ni denNitish Kumar den jembi. Item forces nokdangtsü asoshi ni pa pusemogo,” ta Lalu Prasad-isa ashi.
CM candidate dak sentakba nung Lalu-i, “Ni osang ka jangjatsüner. Ni election nung metokteptettsü. Ni candidate ka masü. Ozü kibong nungi kü kinüngtsü mesüra ozü chirtem shiangiamejangrar. Parnok (parmtanurtem) ano tanur dang lir. Ozü (party) tsütsülen nungi mesüra kibong nungi candidate (CM asoshi) mali,” ta ashi.
“Aji oda süaka olulu balala aika proker. Parnoki (BJP) onokmelongjemtettsü ta jembir. Kumar ji ozü CM candidate asütsü ta sangdongba asoshi ni Mulayam dang pelar,” ta RJD tongti lenirsa shisem.