JD(U)-RJD-Cong teloktep junga masadangtet: BJP

New Delhi, Nov. 09 (Agencies): Bihar assembly election nung BJP-i aniba NDA-i tamakok anguba kuli lemteptsü atema tanü BJP headquarters nung Ato kilonser, Narendra Modi-i party telemtetba agiba tongti tentet nungi züngsem 12 ajurua liasü.
Iba senden tembangba sülen osangbenertem den jembidang Union Finance minister, Arun Jaitley-i, Bihar election osangji BJP-i akhümtsübua agizüker aser sorkar tasenbai terenlok bener arutsütsü imlar, ta ashi.
BJP-i tamakok anguba dak sentakba nung Jaitley-i, “Tamakok anguba tongtibangba kuliji, 2014 Lok Sabha election nung RJD, JDU aser Congress party tem meloktepi parnok kijai toktep. Tanga party tila aser regional party tem aliba ajanga Grand Alliance (JDU(U)-RJD-Congress)-i vote telong junga mangutsü ta onoki bilembaji tai liasü,” ta ashi.
Jaitley-isa, minister kar anema temerenshi agütsütsü atema o melemtep. Party nung Shatrughan Sinha aser RK Singh ama lenirtem nem temerenshi agütsütsü ta imlaa liasü, ta ashi.
Bihar nungi BJP lenir Sinha aser Singh nati election nüboyimba mapang party aitsüba o jembia liasü.
BJP-i Bihar nung tamakok anguba ajanga opposition party tem taruba küm state 5 nung assembly election atema tashi itshitsüa akok. Ato kilonser Modi-i Parliament nung tashi ajunga amshiteta tongtibang bill tem agizüktsü nükjidong nung taruba küm asem nung state assembly election ajak nung takok angutsü nükjidong aliba tan tamakok ajanga tetsükdaktsü ka kümogo. Rajya Sabha nungbo NDA sorkar minority lir.
Sangküm Kerala, Tamil Nadu, Pondicherry, West Bengal aser Assam nung assembly election agitsü, aser item state aser Union Territory nung BJP ano junga amenoka mali.
Yaküm Lok Sabha election nung BJP-i takok tulu anguba sülen parnoki state assembly election tem nunga atonga takok nguyonga aruba sülen taküm February ita Delhi election nung Arvind Kejriwal leniba nung AAP-i BJP nokdangtet aser tan Bihar election nunga Nitish Kumar aser Lalu Yadav nati BJP nokdangtetogo.