JD(U), RJD-i Bihar nung kenüyongi dang election agidaktsüner

New Delhi, July 26 (Agencies): Taruba Bihar assembly election nung JD(U) aser RJD lokteper BJP-i aniba NDA den tokteptsü aser parnoki state nung anogo ka nungdang election agidaktsüner. Taoba assembly election nungbo state nung shilem trok lemsar election agia liasü.
State nung election shilem lemsar hopta dak tema election agira ibaji ajanga senotsü aika aliba party, BJP tajangzük angutsü ta JD(U)-RJD-i bilema parnoki Hombar nü Election Commission ajurua state nung assembly menden 243 asoshi election ji anogo ka nungdang agitsü atema mepishitsü.
Iba dak sentakba nung JD(U) otongdar KC Tyagi-i, Bihar election October mesüra November nung agitsü aser iba election ya sen jenti intokba election ka asütsü, kechiyong onok den tokteper teloktemi sen aika intoktsü ta ashi. Paisa, yimtenren nung tajangzük asoshi benjung mapang nung ya BJP-i maongka agitsü südi ta Chief minister Nitsh Kumar-i aniba telokteptemi bilemer, ta ashi. “Item hopta nung Durga Puja, Diwali aser Chhath benjungtem amongtsü. Dussehra aser Moharram kasa anogo nung amongtsü. (Anungji) BJP aser par teloktep party temi yimtenren asoshi iba tensa amshitsüa akok.
Iba mapang nung onoki election magidaktsüner. Kenüyongi dang election agibaji tajungtiba asütsü,” ta pai osangbenertem dang ashi. JD(U) Tir Sharad Yadav-i anir ‘Janata Parivar’ nung aliba party tem SP, JD(S), INLD aser RJD-i Election Commission ajurua kenüyongi election agitsü atema mepishitsü. Tyagi-isa, state tulu Tamil Nadu aser West Bengal ama nung kenüyongi election agitetra Bihar nunga agitettsü, ta ashi.