Jeep gari nung alenloksangji lung agi aonertem lennir liasü : Major Gogoi

New Delhi/Srinagar, May 23 (Agencies): Chief of Army Staff (COAS) commendation commendation card ka agütsüba sülen anogo ka lir Major Leetul Gogoi-i osangbener den sensaksemdang, pai Kashmir nung nisung ka jeep indang bonnet nung alenlokbaji lung agi aonertem rongnung tanishisang liasü, ta ashi.
Mongulbarnü Major Gogoi-i osangbener dang ashiba agi, iba anogo Indo-Tibetan Border Police (ITBP)-i pa dang Bandipora nung nisung 400-500 shi kati sepaitem dak lung agi aoner ta osang metetdaktsü.
Iba osang angazükba sülen pa minute 30 tsüngda tesem tonga ao aser ITBP jawan den yaritepa tensaji azüok.
“Lung agi ona lungkak aitertem jagi police station tem rongdoktsütsü merang. Ni loudspeaker ajanga parnok dang lung agi maontsü mepishi aser police temji kümzüktsü merang, saka lungkak aitertemi kü temepishiba magizük,” ta paisa metetdaktsü.
Jeep gari nung alenloksang Farooq Ahmed Dar ji telok nung lennir liasü aser onoki pa arshia aoba sülen apu. Ni telokji senshidaktsütsü merang saka parnok mesenshi. Aji agi ni Farooq jeep gari nung alenlok aser ibaji ajanga dang lungkak aitertem azüoktet. Iba inyakyim ajanga nisung aika taküm kümzük, ta Major Gogoi-isa shisem.
Külen, Indian Army tanishisangi Major Gogoi nem sempet agütsüba anema Kashmiri nungertemi ola adoker.
Human rights activist Khurram Parvez-i ashiba agi, rara nung ozüng alema inyakertem nem army-i tenüngsang agütsübaji tang mezüng masü, saka tesüiba küm 30 tashi Kashmir nung ataloka arur.
“Indian Army-i bushisüngdang mesüra ozüng hao ta mali. Parnoki reshikangshiba mapa maneni inyaknür” ta Association of Parents of Disappeared Persons (APDP) tanishir Khurram-isa metetdaktsü.
“Army Major nem sempet agütsüba ajanga Kashmir nunger dang centre sorkari maneni nenok den tashiyim agi mapa inyaktsü ta osang sangoktsür” ta paisa shisem.
Jammu & Kashmir state sorkari Army ketdangser anema ken o ka benoka lir. Parnoki 1949 Geneva Convention nung ajemdaker iba inyakyimji ‘war crime’ ka lir ta ashir.
Kashmir Police tekolak Muneer Khan-i ashiba agi, Gogoi anema FIR benokbaji magientsü aser maneni bushisüngdang asütsü.
London nung alir Kashmiri kaketzülur Mirza Waheed-ia Twitter nung army ketdangser nem India nung gallantry award tematiba agütsütsü ta anemsü agi metetdaktsüogo.
“Ketdangser nem commendation ka dang agütsübaji aibelen inyaker. Sü ataker ka meimchir jung ama amshib atema pa nem Param Vir Chakra agütsütsü” ta Mirza-i ashi.