Jelena-i French open kokogo; Nadal final tongtetogo

Paris, June 10 (Agencies): Honibarnü French open tetsürtem final asaya nung Latvia tsür Jelena Ostapenko-i 4-6, 6-4, 6-3 agi third seed Simona Halep madak takok ngua la atema mezüngbuba Grand Slam title benogo. Iba takok ya French Open otsü nung rank tekübok nung aliba asayar kati asayamong akokba mezüngbuba asütsü.
Alima nung tetsürtem ranking nung jenjang 47 buba nung alila Ostapenko ya unseeded asayar kati Roland Garros akokba mezüngbuba asütsü aser Latvia nunger atemaa otsü tasen ka lir.
1997 küm Iva Majoli-i French Open akokba sülen Arishi küm 20 tain asayar ya iba asayamong akoker rongnung tanutsütila lir.
“Ni kanga pelar aser tebang agi asitsü o kecha mali. Iba ya kü pungmang liasü,” ta Ostapenko-i ashi shiba iba takok ajanga rank 12bubai atutsü.
Asaya nung la mezüngbuba set nung tamakok angu aser tanabuba set nunga 3-0 agi mokoki liasü, saka lai kanga dang tasüita shot tem asayaa iba takok ngutet.
“Ni takok tashi aggressive asütsü dang meranga liasü. Game anajika asayaba sülen asaya kü tsütsüi meyipadok. Ni 3-0 agi mekoki liasü saka ni point ajak atema kanga meranga asayaa liasü.
“Iba takok ya ni tang tashi mamangteter. Iba ya kü pungmang liasü. Ni tanur asüdang iba asayamong repranga liasü aser idak-i asayatsü ya kanga jangratemtsüka lir. Ni kanga jangratema asayaogo,” ta Ostapenko-i ashi.
Halep atema iba asaya ya küm 4 tsüngda nung Roland Garros final nung tanabenbuba tamakok lir. Lai iba asaya akok asünungbo Angelique Kerber melenzüka World No 1 kümla.
“Ni kanga mepelar saka tarutsü nung iba asayamong ya ni akoktsü imlar,” ta Halep-i ashi.
“Ni Jelena tenüng asanger aser iba takok ya lai ajangtetba lir,” ta laisa ashi.
Kasa mapang nung Rafael Nadal-i Hokolbarnü Dominic Thiem 6-3, 6-4, 6-0 agi koka Roland Garros final tongtetogo. Iba final ya pa asoshi 10 ben buba asütsü, koba otsü tasen ka lir. 2014 küm iba final nung asayaba sülenbo taküm ang pai Roland Garros final tongtetogo.
Final nung pa 2015 winner Stan Wawrinka den asayatsü. Swiss nunger asayar yagi Andy Murray semifinal nung koka liasü.
Wawrinka aser Nadal na tsüngda asayaa aruba nung Nadal-i 15 ben koka lir aser Wawrinka-i 3 ben koka lir.