JeM kiralongrar Sajjad Khan puogo; NIA-i pa dang asüngdangyatsü

New Delhi, March 22 (Agencies): Taküm February ita nung kiralongrartemi Pulwama nung CRPF sepaitem amakba asalentong yanglur tongti den inyaksemer Jaish-e-Mohammed kiralongrar, Sajjad Khan Delhi police-i puogo.
Police-i ashiba agi, arishi küm 27 Sajjad Khan ya Pulwama nung alir aser yasüng ayaterm nung police-i Delhi kübok Lajpat Rai Market anasa pa apu.
Sajjad Khan ya National Investigative Agency (NIA)-i tebushidak liasü aser Pulwama amakba tatalokba dak sendakba nung NIA team kati Sajjad dang asüngdangyatsü.
Unlawful Activities Prevention Act (UAPA) kübok NIA-i pa anema ken o ka benokogo.
Delhi Special Cell nungi ketdangser kati ashiba agi, “Sajjad Khan ya Pulwama amakba asalentong yanglur tongti, Muddasir Khan den inyaksemer ka lir. Tawa Jammu & Kashmir nung security sepaitem den raradang pa (Khan) khasetogo. Delhi nung sleeper cell ka amenoktsü atema Khan-i Sajjad Khan nem mapa lemzüktsür liasü,” ta metetdaktsü.
Osang angazükba agi, pa maitsü mimshitsü atema Sajjad ya Delhi nung tabenba-sü shishilembar ka ama inyaka liasü aser pai app ka nung taila number ajanga Mudassir aser Pakistan nunger kiralongrar Yasir na den tongtepratepa liasü.
NIA-i ashiba agi, Pulwama nung CRPF convoy amakbaji Sajjad Khan-i meteta liasü aser iba asalentong nunga shilem agia liasü. Sajjad’er adianu anata Jaish kiralongrar liasü aser tenaji Jammu & Kashmir nung sepaitem den raradang asü.
February 14 nü JeM kiralongrartemi CRPF convoy amakdang sepai 40 pokset. Taküm bendanga agütsür amaksangji Mudassir Ahmed Khan tetuyuba nung inyaker, Ahmed Dar liasü.