JeM telungpurtemi Delhi amaktsüa akok

New Delhi, January 03 (Agencies): Jaish-e-Mohammed (JeM) telungpur ana linük yimtiba telungi aitogo aser parnoki amaktsü südi ta melung melemi bilemdar, aser iba dak sentakba nung tanü yimti nung security tashi itshiogo.
Yimti nung telungpurtem aita aliba osang Delhi Police dangi aruogo, iba osang anguba sülen Delhi Police Commissioner, B S Bassi-i yimti nung aliba sensotem dang kanga kümküma alitsü metetdaktsüogo.
“Sensotem, kiralongraba anema raratsü asoshi melung malemtsüsa nisungtem/osettem/maparentem indang kümküma alitsüla. Iba dak sentakba osang no. 100 mesüra helpline 1090 ajanga agüjang,” ta pai twitter ajanga ashi.
Senior police ketdangser kati ashiba agi, tanü Bassi-i police tongti ketdangsertem ayonga senden ka menogo aser par department-i security atema central paramilitary forces teyari meshiogo.
“Jaish-e-Mohammed tongti züngsem ana Delhi telungi aitba osang onok nem agütsüogo aser parnoki amaktsü akok mesüra nisung aputsüa akok,” ta ketdangseri ashi.
“Iba osang angazüka security akangshitsü atema paramilitary forces company tali ishika nguogo,” ta paisa ashi.
Delhi yimti nung aliba airport, railway stations, bus stands aser tongtibang tesemtem nung security akangshiogo.
Iba dak alia south Delhi aser Central Delhi nung aliba shishilembaba tesemtem aser Lutyens’ Delhi nung VIP movement zone nunga security akangshiogo.
“Atsü atsüdangtsü aser mapang ajak nung mita senzütsü atema onoki tuyuogo. Ketdangsertem sodi agia aliba thinentsüogo. Kiralongraba anema meratem agiogo. Ano railway aser metro station tem nung security akangshiogo,” ta Delhi police Joint Commissioner, M K Meena-i osangbenertem dang ashi.