Jembiba ama inyaktsü Modi ajungshitsü: US

Washington, Oct. 15 (Agencies): UP, Dadri nung Muslim nunger ka tepsetba onük nung Ato kilonser, Narendra Modi-i tamangba lokti balala tsüngda tesenüp nung alitsü ayongzükba dak sentakba nung US tongti ketdangser kati, tamangba lokti tsüngda akhümtsübutepa tesünep nung alitsü atema US-i Modi’er sorkar dang ajungshitsü, ta shiogo.
Press Trust of India (PTI) den jembidang US Ambassador-at-Large for International Religious Freedom, David Saperstein-i “Nashi shi onük dak sentakba nung mangatettep adokba sülen Ato kilonser (Modi)-i tamangba lokti balala tsüngda akhümtsübutepa yimjung nung alitsü ayongzükogo. Linük tesem ajak nung item tangatetbaji atangji nung mapa agi inyaktsüla ta onoki Ato kilonser Modi aser sorkar ajungshitsü,” ta ashi.
State Department-i 2014 küm atema International Religious Freedom report sangdongba sülen Modi’er sorkar yimsüsüba kübok India nung ‘religious freedom’ onük nung tasüngdangba ka langzüdang Saperstein-i, “Onoki ongko meinyaker, onoki atangji osang dang benoker. Iba report ajanga dang langzüdakjang,” ta ashi.
Taküm January ita New Delhi, Siri Fort nung US Tir, Barack Obama-i ‘religious freedom’ indang jembiba tetshia US ketdangser Saperstein-i, “United States Tir-i yangji (India) tamangba yimsü nung ajemdaker linük nung telemsa adokdaktsüba nokdangtsü kanga nüngdak ta ajang-ajanga shiogo,” ta ashi.