Jembitepba ajanga Syria’er mangatettep ken o agientsü mulunga lir: Bashar al-Assad

Beirut, July 26 (Agencies): Syria nung adoka aliba mangatettep ken o agientsü asoshi jembitepba senden amentsü mulunga aliba olen ka Syria Tir, Bashar al-Assad-i tanü Deobar nü metetdaktsüogo.
“Syria’er mangatettep ken o agientsü asoshi jembitepba senden amentsü mulunga lir. Ajisüaka, jembitepba senden nung shilem agirtemi Syria-i tang ajurushia aliba kiralongrar den sentakba timtem agientsü onük benoka mejembira, senden amenbaji amajok alitsü,” ta pai television ajanga metetdaktsü.
Tang Syria sorkar anemer den tongpang teraradak aliba Syria mitkartemi tesem kar nungbo sorkar anemer den tongpang merarai oda toktsüba maparen metentsüba olen ka pai tanü metetdakja liasü.
“Syria sorkari tongti tesem ta züngshiba tesemtem nungi sorkar anemertem meshimeshia makdoktsü nükjidong nung tesem kar nungbo sorkar anemertem den tongpang merarai oda tokja lir,” ta pai osang jangjashitsü.
Paisa ashiba agi, mapang talang ka tongpang raraba ajanga Syria mitkar züngsemtem tajemba akümtsü tenzüka lir saka Syria mitkartemi kodanga tamakok majurutsü.
Syria sorkar anemertemi Syria northwest tsütsü tentetba Idlib province aser par linük anülulentip tsütsü arrtsülen densemba tesemtem nungi sorkar mitkartem makdokba osang bushiteta lir.
Taoba mapang, March, 2011 nungi tenzüka Syria nung mangatettep adoka tongpang kanga sashia raratsü tenzükba sülen tanü tashi nung Syria nung alir ishiba agi nisung 220,000 shi asüba aser nisung million 11 dak temai pei talidak toktsütsüsa akümba osang bushiteta lir ta United Nations (UN)-ia metetdaktsüogo.