Jembitepba senden amenba ajanga dang Afghanistan nung yimjung alitsü: Gen. Sharif

Islamabad, August 05 (Agencies): Afghanistan sorkar aser Taliban telok na tsüngda jembitepba senden amenba ajanga dang Afghanistan nung yimji yimjung alitsü ta Pakistan mitkar lenisang, General Raheel Sharif-i tanü Bodbar nü metetdaktsüogo.

“Tang Afghan sorkar aser Taliban telok na tsüngda yimjung nung alitsü asoshi jembitepba senden amentsü tenzükbaji Afghanistan nung yimji yimjung tia alitsü asoshi tim aser lenmang kija lir,” ta pai ashi.

Küm 14 tejaklen nungi tenzüka tongpang rarabaren anena par telok ana tsüngda yimjung tezüngzüktep agitsü nükjidong nung Afghan sorkar ketdangser aser Taliban telok lenirtemi taoba July ita nungtu Pakistan kübok Murree jila nung mezüngsüa ajurutepa senden amenba osang jangjaogo.

Par teloki anati tanabuba sendena taoba Hokolbar nütu amentsü ayonga liasü saka Taliban lenisang, Mullah Omar asüba yong par lenisütsüren nung makmakshimdak tulu adoka yimjung sendenji bilemba ama mementeti thinentsüsa aküm.

Sharif-i aniba mitkar lenirtemi Afghan-Taliban yimjung sentong densema par Pakistan nung tensa azüoktsü den sentakba senden ka amenba sülen Sharif-i Afghan o Taliban telok na tsüngda maneni yimjung senden amentsü olenji tanü lemsatepa liasü.