Jennifer Lawrence-i tanurtem hospital atema sen million 2 agütsü

February 14, 2016: Actress Jennifer Lawrence-i la aliba jila Louisville, Kentucky nung Kosair Children’s Hospital nem US sen million 2 tenla agütsüogo, aser iba sen jagi hospital nung ward tasen ka yanglutsü.
Academy Award angula, Jennifer Lawrence-i hospital indang YouTube page nung video ka ajanga lai sen tenlabaji sangdonga liasü. Iba kasa video nung lai tangar danga senotsü tenlatsü ajungshiogo.
Video nung Lawrence-i, “Hi, ni Jennifer Lawrence lir. Onoki Kosair Children’s Hospital nung Jennifer Lawrence Foundation Cardiac Intensive Care Unit lapoktsü, ta ni tepela nung sangdonger,” ta ashi.
“Tanurtem aser parnok anepalurtem yaritsü mechi nung aser item tasütait tanurtem yaritsü mechi nung ni nübur ajak dang ni tenlaba sen nung inoksemtsü atema ano sen million 2 tali tenlatsü mepishir,” ta ashi.
Iba dak sentakba nung hospital indang website ajanga Women’s & Children’s Services & Kosair Children’s Hospital Tir, Thomas D. Kmetz-i, “Jennifer Lawrence Foundation-i taochi sayua iba sempet agütsüba atema onok pelar,” ta ashi.
Parnok website osang ka ajanga ashiba agi, Jennifer Lawrence Foundation Cardiac Intensive Care Unit nungji tanurtem temulungjang melenba aser temulungjang failure densema temulungjang operation nungi shia arurtem aser Intensive care atema nija takdangtem alitsü.