Jerusalem, Al-Aqsa Mosque kima raratep

Jerusalem, September 13 (Agencies): Yihuda nunger küm tasen tenzüktsü anasa Palestine nunger o Israel police na tanü Jerusalem, Al-Aqsa mosque kima raratep, ta police aser tenük küli angurtemi ashi.
Israel Defence Minister Moshe Yaalon-i taoba hopta Yihuda nunger anemer Muslim telok ana züngdokba sülen, tanü iba lendong ya atalok.
Palestine nunger tenük küli angurtemi ashiba agi, mosque nung Islam temeshi tesem asembubai police tem ia kechisarena raksatsü.
Ajisüaka police-ibo, lungkak aitertemi parnok dak lung aser oset balala agi aonba ajanga parnok mosque telungi ai aser shibanga ayu, ta ashi.
Tesüiba mapang nunga ketdangsertemi yamajisa inyaka aruogo.
Police-i ashiba agi, Yihuda nunger küm tasen amungba mapang tekülemi maitdaktsütsü tebilemba nung lungkak aitertemi mosque telungi shinga maitdaktsütsü nokdanger liasü.
“Tejak machitettsüsa nembanger alir, lungkak aitertemi police tem dak lung aser tapoktsü tila tem agi aon,” ta police sangdong ka ajanga ashi. “Mosque-i aiba lendi nung pipe kar nung kidang yangluba tapoktsü tsünger yuja aliba-a ngutetogo,” ta sangdong ajangasa ashi.
Muslim amanger tenük küli angur kati ashiba agi, police-i mosque telungi nüngdakba dang nungi talangba ai aser kishi shibanger oset raksatsü. Tekülem mapang amshiba pakti-a rongpeter liasü.
Police-i, Jerusalem yimti tejenba nung mosque kima raratep manenba ajanga police-i ‘tear gas’ aser ‘stun grenades’ tem kahtok aser pokdaktsü saka mosque telung nung tatsüka lirbo süngjema aküm, ta ashi.
“Police-bo telungi yoker saka onokbo nokdanger,” ta taoba hopta züngdokba telok ana rongnung ka züngsem, Khadijeh Khweis-i AFP osangbenertem dang ashi.
AFP osangbenertemi nisung aika nokdanga yur police duty tesashi toktsüba ngua liasü.
Taoba hopta defence minister-i Murabitat aser Murabitun telok züngdokba ya state nung yimjung bener arutsü asoshi lir ta ashi.
Defence minister office sangdong ajanga ashiba agi, iba telok ana yagi mosque aliba tesem nung mepetmesü aser lendong tulu bentsür arur.