Jerusalem ken o anema nokdaker nem teyari magütsütsü: Trump

Washington, December 21 (Agencies): United States-i Jerusalem ya Israel yimtiba ama agizükba anema UN nung temzüng yangluba nung densempa linük nem US-i teyari magütsütsü, ta Tir Donald Trump-i amokmeren.
US-i Jerusalem atema telemtetba agiba nung ajemdaker UN General Assembly ajungben senden Brehostibarnü agiba mapang vote agütsüba repranga atatsü, ta White House nung Cabinet senden ka amenba mapang Trump-i ashi.
“Parnoki sen dollar million noklang aika aser billion aika agir, aser asen anema vote agütsür. Onoki item vote ji repranga atatsü. Asenok anema vote ji agütsüdakjang; asenok sen aika anüngtsü. Asenoki tsübua mali,” ta US tir-i ashi.
“Saka iba ya tamalen ama masütsü, parnoki na anema vote agütsütsü, aser nai sen dollar million noklang aika agütsütsü aser parnok kechi inyaker shingaia memetet. Onok dak nungi tajangzük magütsütsü,” ta Trump-i ashi.
Iba temzüng busemer linüktem tenüng bendentsü, ta UN nung US ambassador, Nikki Haley-i Twitter ajanga amokmerener aliba mapang Tir-i iba o ya ashir.
Iba sülen lai UN ambassador züngsem linük 180 dak tali nem shidi zülua agütsüba nung parnoki vote agütsüba osang ya Trump nem sangoktsütsü, ta shia lir. “Iba ken o nung onoki vote ajak züngzünga repranga atatsü,” ta lai zülu.
Jerusalem ya Israel linük yimtiba asütsü, ta US-i sangdonga aliba meyiba agitsü asoshi Egypt-i UN Security Council nung ken o benok, saka US-i veto tashi amshia iba ken o magizükba ajanga UN General Assembly ya ajungben jateptsüsa aküm.
Security Council nung züngsem 14 prongi Egypt-i benokba nung busema vote agütsü, saka US ya iba Council nung permanent member ka asününg, veto tashi amshia iba ken o magizük aser temzüng mekümdaktsü.