Jerusalem nung Palestine tsür 1 kaset, 1 yiru: Police

Jerusalem, November 23 (Agencies): Israel police ketdangser kati arishi küm 16 tain Palestine tsür ka tanü Hombar nü injang agi kasetba osang jangjaogo ta Israel sorkar ketdangser kati tanü metetdaktsüogo.
Tanü kasetba aiürlai kenji ka amshia Israel senso ta bilemba Palestine nunger tambur ka yirutsüba den külemi, la aputsü merangba police ketdangsersang ka amaktsü tenzükba yong ketdangsersangi laji kasettsüsa aküm ta pai osang jangjashitsü.
“Jerusalem yimti tiyongtsülen, Jaffa Road kiyong nung aiürlai arishi küm 70 tain tambursangji yirutsüba osang jangjaogo,” ta police-ia metetdaktsü.
Police ketdangsersangisa tanü kasetla den sema, kenji ka bener tambusang amakba arishi küm 14 tain Palestine tsür tanga ka yirutsüba osang jangjaogo ta police-i shisem.
Ano, tetsür ana dakji kaloktsüdang tezülen aoba injang kati anasa alir Israel senso ka dak kashia yirutsüba sülen iba nisungbaji tang mozükidang anepalua aliba osang jangjaogo ta parnoki metetdaktsü.
Taoba October ita 1 nü nungi tenzüka Palestine aser Israel nübur rong nung mangatettep tanaben adokshia amakba maparen balala inyakba ajanga tanü tashi nung Palestine nunger nisung 84 asüba osang jangjaogo.
Kasa lendong nung Israel nungera nisung 19 shi asüba osang bushiteta lir.