Jerusalem onük nung Kashmir nung US anema longkak ait

Srinagar, December 08 (Agencies): United States Tir, Donald Trump-i Jerusalem ji Israel yimtiba lir, ta sangdongba anema Hokolbarnü Kashmir Valley nung US anema longkak ait, ta ketdangsertem osang ka ajanga metetdaktsü.
Srinagar kübok Maisuma aser Hasanabad kiyong na nung Hokolbarnü Muslim nunger sarasadem tembangba sülen US Tir Trump anema yimyim ayima longkak ait, iba den külemi pa mesükba noksa rongdoka liasü.
Alima linüktemi aijaaka Bodhbarnü Trump-i Jerusalem ji Israel yimtiba lir ta sangdonga liasü.
Tanü Maisuma tesem nung Jammu and Kashmir Liberation Front (JKLF)-i ayongzüka US Tiri Jerusalem dak sendakba nung telemtetba agibaji agientsüla, ta takhangba agüja longkak ait.
South aser north Kashmir tesemtem nunga Muslim nunger tekülem sentong tembangba sülen nisung aika adenshia US telemtetba anema longkak ait.
Separatists-ia ayongzüka Kashmir Valley nung longkak ait. Lendongtsüdong mataloktsü atema ketdangsertemi Nowhatta, M.R. Gunj aser Safa Kadal nungbo curfew ozüng benoka liasü.
Srinagar tesem aika den Kashmir kübok district headquarters ajak nung police aser Central Reserve Police Force (CRPF) mapa lemzüktsü.
Ano Jamia Masjid nung tekülem sentong magitsü atema ketdangsertemi tuyua liasü.
Hokolbar shia Mirwaiz Umer Farooq-i Jamia Masjid nung sayutsüngir, ajisüaka tanübo pa par kidangi ayazüka aotsü memelai liasü.