Jerusalem & West Bank na nüburtemi süngjema alitsü ajungshir: Ban

United Nations, October 04 (Agencies): Tensa tamajungba mekümdaktsütsü nükjidong nung Jerusalem aser West Bank na nüburtemi aremzüktepa tali süngjemtsü tajungshiba olen ka United Nations (UN) Secretary General, Ban Ki-moon-i tanü Deobar nü metetdaktsüogo.
Jerusalem nung Israel senso 2 tespetba den külemi, nisung ishika yirutsüja tensa mejungi kümdaktsübaren aitsüba olena Ban-i tanü metetdaktsü.
Islamist kiralongrar ta temulung melemi bilemba Palestine senso kati Israel senso 2-ji tepsetba den külemi, kotari aser prangpong abensangi tetsür 1 aser tila tanur 1 densema nisung 2 tashi Jerusalem yimti nung yirutsüba osang bushitetogo.
“Tawa Israel-i agia aliba West Bank nung alir Israel nunger kibong ka amakba densema, tan lendong atalokdaktsüba ajanga Jerusalem aser West Bank na nung tensa kanga mejungi kümdaktsüba maparen kanga sashia aitsür,” ta Ban-i nenshia ashi.
Ano, tan lendong ataloktsübaren temaba jenjang nung ajungketja jembiba atema Hamas telok desnema, Palestine nung tentetba telungpur aser kiralongrar teloktema aitsür ta Ban-i shisem.
“Tan lendong ataloka tensa mejungi kümdaktsüba maparen aitsüba den külemi, tarutsü mapang nung iba amala lendong matalokdaktsüsü asoshi nungdakba maparen inyaktsü atema lenirtem ajunga ajungshir. Ano, tensa tamajungba mekümdaktsütsü asoshi nübur aser lenir ajungai aremzüka nungdakba maparen ajunga inyaktsüla,” ta pai ashi.
Tan lendong atalokba densema, West Bank aser Jerusalem na nung mapang shia tan amala lendong balala atalokba ajanga Israel aser Palestine na tsüngda taoba mapang nungi tang tensa tamajungba küma tanaben tongpanga raratsüsa tensaji akümtsü akok ta lenir aikati bilema tebilemtsü khuret benoktsü tenzüka lir.
Ano külen, US semdangsang, Israel Ato Kilonser, Benjamin Netanyahu-ia tanü par Israel tonga aoba sülen par Defense Minister, Moshe Yaalon den ajurutepa tan atalokba lendong den sentakba onük benoka senden ka amenba osanga jangjaogo.