Jerusalem:ISIS den sendaktepa alirtemi amakdang nisung 4 asü

Jerusalem, January 10 (Agencies) : Jerusalem nung sepia telok ka aliba tesem nung nisung kati truck gari ka anir tsüoka aiba lendong nung sepia 4 asü aser 10 yiru, ta Israel Ato Kilonser Benjamin Netanyahu-i ashi.
Sepai ana aser raliwalirtem anir jajar, shiba reserve nung colonel ka lir, parnoki iba gari anisang, arishi küm 28 tain, Fadi Qunbar yangjisa khaset.
Iba lendong agütsüba dak sendakba nung temulung melemtetba nisung 9 tashi pua lir.
Ketdangsertemi ashiba agi, pa inyakyim yimya ajak agi Qunbar ji Islamic State (IS) pusemer ka ta sayur.
“France, Berlin aser tang Jerusalem nung kiralongrartemi maneni lendong tulu agüja arur aser item amakba ajak ya sendaktepa alitsü akok,” ta Netanyahu-i ashi.
Tasür parnok pezü rongnung asem tetsür liasü aser parnok nisung asem ano cadet ang liasü. Parnok rongnung kabo officer liasü.
“Ni tanü Jerusalem nung kiralongrartemi tepsetba nisung pezüprong mang ayimer. Israel nunger ajak tenüng nung ni parnok kinungertem den asükhu lemsateper,” ta Netanyahu-i ashi.
Iba sepia telokji bus gari ka nungi alur pei yangkhu agizükba mapang iba nisung jagi truck gariji parnok dak aniloktsü.
Iba tatalokba atema kiralongrar telok shingaia ano tanüng magi, ajisüaka Hamas-i Twitter nung tenüngsang agütsüogo.
“Jerusalem nung truck gari agi kanga tasü ita iba mapa inyakba atema onoki tenüngsang agütsür,” ta par teloki tweet asü.