Jhabua bomb lendong nung nisung 89 süogo, 100 tema yirua lir

Jhabua (MP), September 12 (Agencies): Honibar nü Petlwad jila nung nisung aika aliba tesem anasa tapoktsü (mining explosive) yua aliba ki ka apokba ajanga tajemba agi nisung 89 süogo aser 100 shi yirua lir.
Iba lendong ya anepdang 8:30 ako nung atalok koba ajanga tzübo atudang amshiba tapoktsü yua aliba ki aser iba anasa aliba restaurant ka ta, ki ana meshimeshia raksatsü. Iba den külemi anasa aliba ki aika raksatsüogo, ta ketdangsertemi ashi.
“Iba lendong ajanga nisung 89 süogo,” ta iba tesem nung medical officer Urmila Choyal-i PTI dang ashi.
Item tapoktsü ya Rajendra Kasawa’er kidang yua liasü aser pa ket nung tzübo atudang lung aliba tesem nung tapoktsü amishitsü asoshi temelaba (license) lir.
Kasawa-i ‘gelatin stick’ dena item tapoktsütem ya bus gari anenba tesem tasenba aser nisung kanga mazüngi aliba Sethia Restaurant anasa aliba, par ki, koba nung dokan-a ana lir, yangji yua liasü, ta police ketdangsertemi ashi.
Lendong atalokba mapang restaurant anasa ayangertema aika mentepa liasü.
Iba dak alaka ano telung nunga nisung aika liasü kechiba süra iba restaurant ya iba tesem nung chiyungtsü achidak tesem tongti ka lir, ta tenük küli ajanga ashi.
Yirur alir rongnung ka, arishi küm 42 tain, Narsingh-i ashiba agi, lendong atalokba sülen nisung mang poksaba agi ali sünga liasü.
“Onoki nisung poksabaji langka yima arua ali nung tsüker amai sa angu. Tetsüng ana aketba garitem-a kanga mejung poksar zükshitepa lir. Iba ki kanga sashia apokba ajanga tapoktsü yua aliba ki koba anaben atongtepa asüba ki lir, ibaji jirepa nisung aika nembanga liasü,” ta pai ashi.
State home minister Babulal Gaur-i, iba tatalokba nung kanga aroka ia bushisüngdangtsü asoshi tetuyuba agütsüogo, ta metetdaktsü.
Tasürtem asoshi temulung raksaba lemsatep dang chief minister Shivraj Singh Chouhan-i tasür kinüngertem nem sen lakh kaka aser yirur alirtem nem sen meyirjang tenemnem agütsütsü sangdongogo.
“Tang tashi nung tasümang 60 bo sensa-a reprangogo aser tanüngba tasümangtemjia sensa-a reprangtsü asoshi yua lir,” ta chief medical officer Arun Sharma-i ashi.
Tasürtemji ayanger timba liasü. Parnok ya teti ama mapa atatepa aliba mapang lendong ataloka liasü.
Gujarat-i aotsü purtema hotel kima süngo jema liasü aser parnok rongnungia timba ka lendong nung süogo, ta police-i ashi.
“Iba dokan ana aliba kidang mezüngbo tanur pokshishiba kar apoker ama angashi saka ki lapoka reprangdangdang kanga sashia apokba ajanga nisung ajak atsüktsü tesem bushia asemtepa liasü,” ta yirur alir ayanger rongnung ka Balram-i PTI dang ashi.
Narsingh-i, “Tesem nungi jena aortem ang timba masü saka teyirubosa yiru,” ta ashiba mapang nisung 150 shi yirur alitsü ta shisem.
Lendong atalokba ki anasa aliba restaurant nung nisung aika nembanga lir, ta paisa ashi.
Mezüngbo iba lendong ya restaurant nung aliba gas cylinder ajanga adok, ta police-i shia liasü.
“Ni ketdangsertem den maneni osang agitepdar. Iba lendong ya kanga tejashika koba ajanga ni temulung animesüngzükteter,” ta chief minister-i ashi.
Jhabua nung superintendent of police, GG Pandey aser state tribal welfare minister Antar Singh Arya na den ketdangser tejentem lendong atalokli yongi tesem tonga oa liasü.
“Lendong atalokdang ki agi anenbanga alirtem kaktettsü asoshi hadir teperi bener National Disaster Response Force (NDRF) yokogo,” ta Delhi nung NDRF director general OP Singh-i metetdaktsüogo.