Ranchi, September 4 (Agencies) : Ranchi nung Kashyap Memorial Eye Hospital (KMEH)-i ayongba ‘Run of Vision’ sentong nung Jharkhand Angh, Draupadi Murmu-i la tenük tenlatsü nangzükogo.
KMEH nung Medical Director, Dr Bharti Kashyap-i, “State Angh, Draupadi-i tenük agi mangu alir ka ngudaktsütsü mechi la tenük tenlatsü nangzükba atema onoki kanga pelar,” ta IANS dang ashi.
“Onoki Run For Vision sentong ya küm 11buba ayonga akar aser iba sentong ajanga state nüburtem dang tenük tenlatsü ajungshir. Asen linük nung küm shia nisung 25,000 nungi 30,000 tashi tenük tashidak, cornea agi okronger. Cornea yabo nisung tangar ka indang melena inoktsüba (transplant) dak alaka ibai mesükba tanga kecha agia memelenteter,” ta lai ashi.
Tang tashi nung KMEH nem nisung 426-i tenük tenlaogo aser item rongnungi 366 tashi takok ngua melenogo.
KMEH dang tenük tenlatsü nangzüker linük lenirtem rongnung Congress lenir Jairam Ramesh aser tesüiba mapang Chief Minister aser BJP lenir Arjun Munda na dena lir.
“Alima nung aliba nükpoker million 37 rongnung India nunger million 10 lir. Anungji ibai atema ajaki metetpelatsü nüngdak,” ta Angh Draupadi-i ashi.
You must be logged in to post a comment Login