Jharkhand nung arasenba mapa inyaker tetsür pongu tepset

Ranchi (Jharkhand), August 08 (Agencies): Ranchi district kübok Kanjia yimtsüng nung alirtemi arasenba mapa inyakertem, ta melung melemi tetsür pongu tepsetogo.
Superintendent of Police (Rural) Raj Kumar Lakra-i, yasüng ayaterm mapang yimtaklir telok kati ajok aser techira oset balala amshia tetsürtemji tepset, ta ashi.
Tetsürtem jagi arasentsür mapa inyaker ta melung melemi yimtaklirtem jagi tepset, ta police-i ashi.
2013 küm Jharkhand nung nisung tepsetba ken o 160 nungi ken o 54 bo arasentsürtem ta aija tepsetba ken o liasü, aser 2001 küm nungi tenzüka tanü tashi nung state nung arasentsürtem ta melung melemi tetsür 400 shi tepsetogo.
National Crime Records Bureau-i ashiba agi, 2000 nungi 2012 küm tashi nung linük nung arasentsürtem ta melung melemi tetsür 2,097 shi tepsetogo.
Jharkhand Chief Minister Raghubar Das-i iba tatalokba aija sangdong ka ajanga, “Tangatetba shisatsü aliba putu ka nung, iba tatalokba ya tejashitsüka lir. Lokti-i iba ya junga shisadangtsüla,” ta ashi.