Jharkhand nung Maoists-i bomb amshia police 7 tepset

Jharkhand, Palamu district nung Maoists telungpurtemi bomb amshia police gari ka amakdang tepsetba police tenet indang tasümang süngden noksa nung angur.

 Ranchi, January 28 (Agencies): Jharkhand, Palamu district kübok Chattarpur tesem nung Maoists telungpurtemi ali telung nung bomb rema toktsür police gari ka amakdang tajemba agi police tenet tepset aser trok yirutsüogo.

“Jharkhand, Palamu district nung Maoists-i ali telung nung bomb rema toktsür police gari amakba lendong nung police tenet süogo aser trok yiruogo. Tang telungpurtemji tebushitak lir,” ta Brihostibarnü Jharkhand Director General of Police, D.K. Pandey-i osangbenertem dang ashi.

Osang ajanga angazükba agi, yasüng Palamu nung Maoists telok kati police 12 den minibus anisang mena aliba mini bus ka amak.

Bodhbar nikongdang 5:00 ako meta police temji Kalapahari tesemi aoba mapang iba lendongji atalok.

Anogo ana tejaklen Jharkhand Police-i Kalaphari tesem nung Maoist telok ka longbanga liasü, aser iba mapang nungjagi tenzüka police aser Maoists na tsüngda kahtep tenzük.

Police ketdangser kati, “Tanü nikongdang 2:00 ako meta police aser Maoists na tsüngda sashia kahtepdang onoki sepai tali yoksemba mapang parnokji amak,” ta ashi.

Iba lendong nung yirurtemji Daltonganj-i anir ogo aser kanga mejungi yirua alirtemji yasüng ayaterm nung helicopter ajanga Ranchi-i anir ogo.