Jharkhand nung Muslim nunger 2 alenseta südaktsü

Ranchi/Daltonganj, March 19 (Agencies): Yaküm Dadri nung nashishi achi ta tai tonglokja Muslim nunger ka tepsetba tatalokba tu mesüka Hokolbar nü Jharkhand, Latehar nung Muslim nunger ana shishilembadaki aodang lenmang nung telok kati tena dak azükba sülen süngdong ka nungi alenseta südaktsü.
Muslim nunger arishi küm 35 Muhammad Majloom aser Azad Khan (15) naji kiset shiruru shilembartem liasü.
“Tena alenseta südaktsüba yimyaji ajanga tena tepsetertemi jagi kanga tesempa nung tepset ta temaitsü sayur,” Latehar SP, Anoop Birthary-i ashi.
Jharkhand Vikas Morcha (Prajatantrik) MLA, Prakash Ram-ibo, iba ya Hindu yimsü alia benshirtemi inyak ta tai tongloktsüogo.
Iba dak sentakba nung Honibarnü nisung pongu puogo aser maneni nisung asem bushidar. Nisung tepsetbaji sen aser shiruru auyatsü atema asü tsükchitepba ajanga’a ibaji tang police-i bushisüngdangdar.
SP Birthary-i ashiba agi, “Tai tonglokja alirtem jagi, parnoki shiruruji auyaa bazaar nung yoknüa liasü ta shiogo. Jang 8 ayokba ajanga sen lakh ishikabo yokzüktsü,” ta ashi.
Ajisüaka arem nungi jang pezü angu aser tai tonglokja alirtem ket  nungbo jang ana dang liasü.
Tang ketdangsertemi Balumath nung tensa meraksatsü atema Section 144 benoka lir.