Jharkhand nung tetsür ka raksatsür tepsetba ken o nung nisung 14 apu

Ranchi, Monupii/May 05 (Agencies): Jharkhand nung Chatra district kübok Rajatenduwa yimtsüng nung arishi küm 16 tetsür ka tashiyim amshia raksatsür tepsetba ken o nung tanü police-i nisung 14 puogo, aser nisung pezübo jenshia senzüdar.
Aiür chanulaji lar kinünger kiyimba sentong kati aoba mapang nung tai tonglokja alirtem jagi la kangshia arem kati anir oor la dak tashiyim mapa inyak.
IGP, Ashish Batra-i, “Local village panchayat senden ka ayong aser parnoki tai tonglokja alirtem dak tai putet. Yimdak lenirtemi aibelenertem dang senchi 50,000 achi. Iba obendang agütsüba tejashi nung aibelenertem jagi panchayat züngsemtem aser tetsürlar kinüngertem den rara mena. Iba sülen parnoki tetsürlar kidang jagi oa kidang mi senokja tetsürlaji rongset,” ta metetdaktsü.
Iba sülen tai tonglokja alirtemji yimdak nungi ajen. Police-i parnok 14 puogo saka nisung pezübo jenshia senzüdar.
Iba osang angashia Jharkhand Chief Minister, Raghubar Das-i iba tatalokba aitsüogo.
Sangdong ka ajanga Das-i, iba tatalokba osang angashia aoksar; item ama nisung tamajungertemji meimchir lokti nung alitsü metemsü, ta aitsüogo.
Aibelenertem dang tai matoktsü, ta shia chief minister-i iba tatalokba nung shilem agirtem pua temerenshi tulu agutsütsü tetuyuba agutsüogo.