Jharkhand nunga GST Bill agizükogo

Ranchi, August 17 (Agencies): Parliament House anaprong nung Goods and Services Tax Amendment Bill agizükba sülen tanü Jharkhand Legislative Assembly nung iba bill agizükogo.
Assam aser Bihar na sülen iba bill agizükba tasembuba state ji Jharkhand kümogo.
Party balala nungi süaka MLA temi iba bill agizükba atema pelaba lemsatepdang state  Chief Minister, Raghubar Das-i, MLA temi obang ka ser ‘linük ka, saru ka’ agizükbaji tatishitsü tajung lir, ta ashi.
GST Bill ya tajemba agi state legislatur 15-ibosa agizüka Tir nem metetdaktsütsüla, iba sülenang GST Council nem metetdakja saru rate atema telemtetba agitsü.
Linük nung iba bill mapa küma inyaktsü atema Centre-i 2017 küm April ita lateta lir.
GST Bill agizüktsü atema Telangana sorkaria tan ita Assembly senden ayongtsü lemtetogo,” ta tanü Telangana Finance Minister, Etela Rajender-i metetdaktsü.
Taoba Hokolbarnü Assam nung mezüng GST agizükba sülen yashi Bihar nunga kasa bill agizüka liasü.
Bihar nung JD(U), RJD, Congress aser BJP densema tongtibang party ajaki melunga iba bill ya voice vote ajanga agizük.