Jharkhand: Tekülem ki anasa nisung 11 ajemset

Ranchi, August 10 (Agencies): Hombar anepdang Jharkhand, Deoghar kübok Belabagan nung aliba tekülem ki anasa tajemba agi nisung 11 ajemset aser nisung 50 shi yiruogo.
Iba tatalokbaji tanep 4:30 ako meta Ranchi nungi kilometer 350 shi pila oor Belabagan nung aliba Durga tekülem ki anasa atalok, ta civil surgeon Diwakar Kamath-i osangbenertem dang ashi.
Police ketdangsertemi ashiba agi, tekülemertemji Ganga ayong tzü bener tenla agüja külemtsü atema tarensen ana küma kilometer 15 shi noktaka liasü, aser parnoki tarensenji raksar tekülemi ki tsütsüleni asemtepba ajanga iba lendongji ataloka liasü, aser iba lendong nung yirurtemji tang mozükidang yaridagi.
Iba osang angashia Jharkhand chief minister Raghubar Das-i asüko osang lemsatepba den külemi asür shia kibong nem sen lakh 2 aser yirua alir shia nem sen 50,000 teyari agütsütsü sangdongogo.
Iba tatalokba dak sentakba nung Lok Sabha senden nung home minister Rajnath Singh-i, lokti azüoktsü atema RAF company ana (sepai 200 shi) Deoghar-i yokogo, ta ashi.
Hindu calendar nung Shravani ita mapang nung nisung lakh 30 dak tema Baidyanath tekülem kidangi oa sarasademer, aser tanü anogo kija nunga tekülemertem lakh ana shi liasü.
India nung tamangba yimsü benjung balala nung nisung ajemsetba lendong ya kanga bulua ataloker.