Jiangsu Suning-i Ivan Santini alizükogo

Chiteni/July 29, 2019 (Agencies): Chinese Super League (CSL) club Jiangsu Suning puri Croatia nunger striker Ivan Santini den tenangzüktepba ka yangluogo aser iba ajanga parnoki Real Madrid nungi Gareth Bale alitsü asoshi meranga aliba tembangtsü imlar.
Anderlecht nungi Santini alizükba indang osang ya Jiangsu puri social media ajanga Hombar anepdang metetdakja liasü. Parnokisa Inter Milan nungi Brazil nunger defender Miranda taoba hopta alizükogo aser iba tetezü club nung bendanger asayar pongu jungogo.
CSL temzüng nung club shia nung bendanglen asoba asaya pezü dang parnok indang official squad nung züngoksemdaktsür aser Italy nunger defender Gabriel Paletta yakta club toktsür aotsü imlaa aliba mapang ka nung Jiangsu pur quota Santini alizükba ajanga süngdaktsüogo.
Jiangsu puri Bodhbarnü Chinese Super League’s transfer window meshibang tsüngda Bale alizüktsü imlaa liasü, kong Wales nunger international asayar nem ya hopta ka nung pound million kaka agüja Chinese football nung nüngtugu asayar rongnung tajungtiba ka anioktsü imlaa liasü.
Ajisüaka Deobarnü osang ajanga ashiba agi, China nung club yagi küm asem atema free transfer nung Bale anir aotsü benokdangba sülen Real indang board-i pa yoktsü asoshi memulungi liasü.
Santini alizükba tetezü Jiangsu puri Bale nem lenmang aitsütsü asoshi Alex Teixeira mesera Eder Martins anintsüsa akümtsü, saka tenaprongla ya coach Cosmin Olaroiu indang team nung tongtibang asayar lir anungji tena anintsüji tamakoktsü asütsü.