Jihad ji kiralongrar anema amshitsüla: Islam scholar

New Delhi, November 17 (Agencies): Muslim yimsü amangertemi jihad (temeshi rara) ya kiralongrartem anema raratsü asoshi amshitsüla kechiba süra Islam tesayuba nung yamaji shia lir aser ibaji ajanga yimjung aser tesünep ajungkettsür, ta Islam scholar kati Mongulbarnü ashi.

“Temen kenteta entoktsü asoshi jihad ayongbaji inyakim shitak lir, ajisüaka tai maketba nisung tepseta entokbaji jihad-i aitsür,” ta Jamiat Ulema-I-Hind lennir Maulana Mahmood Madani-i New Delhi nung aliba Constitution Club nung osangbenertem den jembidang ashi.

Islam tenüng menükja kiralongra mapa inyakertem anema Islam linüktem ajaki raratsü nüngdaker, ta pai ashi.

“Tangar temeten akhüm metetsübuba aser tangar tamangba anemba yimya kechi südir süaka khenyongi anenadoktsü nüngdaker,” ta paisa shisem.

Prophet Mohammed-i, “Nisung taküm ka kümzükbaji kin rangben ka kümzükba mesüka lir,” ta ashiba pai jangjashitsü.

Madani-i, November 18 nü kiralongra mapa anema linük nung sentong akatsü ayonga lir. Delhi, Hyderabad aser Mumbai dena yimti 65 shi nung iba sentong akaba mapang Muslim telok balala nungi lennirtema shilem agitsü sentong lir, ta ashi.

Jamiat Ulema-I-Hind nung lenniri, kiralongrartemi Islam tenüng amer meimchir taküm lalutsüba ya tebilemtsü tulu lir, ta ashi.

“Kiralongrartemi Islam-i melaba ama parnoki benshir aser parnoki inyakbaji shitak ta ashir. Anungji Muslim scholar aser clerics temi Islam tesayuba shitak angatetdaktsüba ajanga Islam tenüng menüktsürtem inyakim nokdangtettsü,” ta pai ashi.

Madani-i, kiralongrartem maparen ajanga Muslim amangertem timba akoksaba shingaia maitsütettsü, ta ashi.

Paisa, 2007 küm par teloki kiralongra mapa anema senden aser rally balala agia liasü, ta ashi.