Jihadist kiralongrartemi Mali hotel nung nisung 27 tepset

Bamako, Nov. 20 (Agencies): Tanü Mali yimtiba, Bamako nung aliba Radisson Blu hotel nung Jihadist prangpong amertemi hotel nung inyakertem densema nisung 170 sota ayu aser nisung 27 tashi tepsetogo.

Mali security osang ajanga ashiba agi, security sepaitem prangpong amer ana tepsetogo.

Hotel amakba ya al Qaeda den densema aliba African Jihadist telok, Al Mourabitouni-i inyak ta parnok sasa tenüng agiogo.

Iba hotel nungji Dubai nung amenoka aliba Indian business group ka atema inyaker India nungera nisung 20 munga liasü aser parnok ajak kümzükogo, ta Indian foreign ministry otongdar, Vikas Swarup-i ashi.

AFP osangbener kati, “Bamako yimti tiyong nung takdang 190 aliba hotel telung nung automatic prangpong akahba olaji kimalen nungi angashir, aser sepaitemi iba tesemji longbanger lir,” ta ashi.

Security osang ajanga ashiba agi, prangpong amertemji par mapang 7:00 ako (India mapang 12:30 ako) meta diplomatic plate aliba gari ka nung hotel compound telungi ait.

AFP den jembidang Mali army commander, Modibo Nama Traore-i, prangpong amertem hotel telung jagi ‘Allahu Akbar’ (Tsüngrem Tulusang) ta ayimtena aitba sülen tanükertem dak injang kahloktsü, ta ashi.

UN ketdangser kati, iba tesem nung aliba UN peacekeeper temi hotel mezüngbuba tamentep nung tasümang 12 aser tanabuba tamentep nung tasümang 15 anguba osang metetdaktsüogo, ta ashi.