Jio company-i Prime Members küm 1 agi atsülangshitsüogo

New Delhi, Metsüremi 31 (Agencies): Reliance Jio puri Rogonü sangdong ka ajanga ashiba agi, Jio Prime members shirnok Metsüremi (March) 31, 2018 tashi nung züngoksemogo parnok nem taa kecha magi ita 12 angati prime benefit tem offer asütsü.
Jio amshir tasentem atema prime membership ya küm nung sen 99 agitsü, ta company sangdong ka ajanga metetdaktsü. “Jio Prime members shirnoksa Metsüremi 31, 2018 tashi exclusive membership benefits atema subscribe süa lir parnok nem taa talila magi-i küm ka tema prime benefit tem agütsütsü,” ta sangdong ajangsa metetdaktsü.
Taoba küm ka tsüngda prime membership nung züngoksema alir Jio customer tem nem Live TV channels, movie, video, aser ken amala access sütettsü asoshi maongka agüja aruogo.
Jio prime members shirnok Metsüremi (March) 31 nü mesera iba masüdang züngoksemogo parnok ajaki ita 12 atema Jio pur offer agütsüba ya agitsü asoshi MyJio app download süa züngoksemtsü nüngdaker.
“Subscriber tesentem nema Jio Prime membership meneni agütsüba ajanga Jio puri India nunger nem digital tsütsü tajangshiba balaka agütsütsü asoshi bendanga agüja inyakba tali tejangjaba sayur,” ta kasa sangdong ajanga metetdaktsü.
Reliance Jio ya India nung telecom shishilembadak 2016 küm nungi shilem agi tenzük aser iba ajanga tanga telecom operator tem parnok indang data aser voice rates ajemtsüsa aküm. Ajisüaka iba tetoktepba ajanga telecom industry nung kanga mejungi kongshiogo aser iba ajanga takoksa aika aluogo koba ajanga operator karbo peisasa menokdaktettsüsa jenjang tashi tongogo.