Jio Phone nung yakta WhatsApp Support asütsü akok

Metsüremi 22, 2018 (Agencies): Reliance JioPhones koba Linux-based light mobile Operating System, KaiOS agi mapa inyaker iba phone nung yakta WhatsApp amshitettsü akok. Wabetainfo.com koba ajanga WhatsApp feature tasen tentanga liasü parnok osang ka ajanga ashiba agi, Tsüklai (February) 2018 tashi nung KaiOS Technology pur partner tasen aika yangluogo aser iba nung Facebook densema lir.
“BlackBerry OS aser Windows Phone 8 nung iba app ya agütsü anenba sülen Facebook meyong iba messaging app ya iba platform atema yanglutsü asoshi sentong lir aser iba ajanga JioPhone tem atema app ka agütsütsü,” ta website ajanga metetdaktsü.
“WhatsApp ya taruba Luchii (December) 31 nungi Nokia S40 nung mapa minyaki akümtsü aser iba ajanga Symbian platform ya doktsütsü, saka iba melena KaiOS OS nung iba app ya support asütsü,” ta kasa sangdong ajanga metetdaktsü.
“Kanga dang nüngtugu social media app ya KaiOS ajanga mapa inyakba feature phone tem atema agütsüogo. Iba telongjem yagi native KaiOS app ajanga Facebook amshitettsüsa teyari agütsür aser iba ajanga tamshirtem aika kinunger aser medemertem den sendakteptsü asoshi maongka agütsür,” ta KaiOS puri sangdong ka ajanga metetdaktsü.
Iba OS ya 2011 küm tenzükba Firefox OS open-source project nungi jakzükba lir aser 2016 küm nungi tenzüka Mozilla nungi pilar iba kija ya inyaka arudar. KaiOS ya US market nung 2017 küm sayaa liasü. Iba mobile OS ajanga 4G/LTE, Wi-Fi, Bluetooth aser GPS dena support asütsü aser manufacturer tulutem indang chipset tem dena putepa amshiteter.