Jio voice calls teti atema angadi asütsü: Mukesh Ambani

Mumbai, Sept. 01 (Agencies) : India nung aliba telecom company tem ajak dang tajungba asütsü toktepba mapang ka nung Reliance Industries nung mendenbuba, Mukesh Ambani-i, “Jio network nungi domestic call tem teti atema angadi asütsü, ta Brihostibarnü metetdaktsü.
Pai September 05, 2016 nü nungi tenzüka ita pezü tashi ajak atema zero-tariff voice aser data services-a sayatsüogo
“Voice calls atema taa agiba mapang joko tatembang kati arur,” ta Birla Matoshree Auditorium nung 42buba company Annual General Meeting agiba mapang Ambani-i ashi.
“Tang nungibo Jio amshir shinga dang nungi voice call atema sen magitsü,” ta pai o jembiba mapang ashi.
Sangküm January ita nung ano langka tasen ka sayatsü shisem ajisüaka iba tsütsü osang tejangja kecha memetetdaktsü. Reliance Industries-i tan Jio atema sen billion 21 tashi intokba ya parnoki tanga mapang nung project ka atema intokba dang nungi timba lir.
Pai, “Data plan tema MB shia base rate poisa 5 mesüra GB shia sen 50 akümba ajanga tamshir ajaki atutsü,” ta shisem.
Ano data tariff-a GB shia sen 25 tashi aluba den külemi ajaki angatettsüsa yanglushitsü. Domestic voice calls tem atema sen magitsü aser international call tema sen dalangba akümtsü, ta paisa ashi.
Taoba ita Airtel, Vodafone aser Idea company temi discount kar metetdaktsüba sülen item dangji tajungba asütsü atema Reliance Jio-i item offer ya sangdongerba lir.
O jembiba mapang Ambani-i, tanga company temia Jio nokdangtsü memerangi külemi lungjemer inyaktsü merangtsüla. Tanga network temi junga mesentaktepba ajanga taoba hopta kisüng nung Jio customer crore 5 dak tema tanga network dangi call junga mesütetba timtem ajurua liasü, ta ashi.
“Sen jenjang kanga ashishiba, India ama linük ka nung ajaki atutsüsa data service sen alutsüba aser teti atema angadi voice call agütsüba ya ajaki kanga pela agizüker aser iba ya ajanga data amshir tali akümtsü,” ta Ernst & Young nung Global Telecommunication lenir Prashant Singhal-i ashi.
Mukesh Ambani-i item onük nung amshia jembi:-
–     Kaketshirtem nembo Jio main tariff data noklang nung shilem 25 talila agütsütsü
–     2017 March ita tashi nung Jio agi linük nung aliba netsüng shilem 90 atongtsü
–     4G amshitetba smart devices tem yanglutsü
–     December 31, 2017 tashi nung sen 15,000 alang Jio apps anagadi agütsütsü.