JIT-i India nung bushisüngdang temogo

New Delhi, April 01 (Agencies): Kiralongrartemi Pathankot amakba ken o bushisüngdangtsü atema Pakistan nungi telok ka India-i arua liasü aser tanü agi anogo troknübuba nung parnoki iba maparen tembangogo.
Iba ken o bushisüngdangtsü atema Pakistan nungi aruba telok, Joint Investigating Team (JIT)-i kuli agütsürtem o aser iba anogo nung tepsetba kiralongrartem DNA osang bendenogo.
Ano iba ken o bushitsü atema NIA-ia Pakistan semdangtsü benok aser JIT-i ibaji agizükogo.
Bushisüngdangba mapang bendenba kulitem presentation ka JIT nem agütsüba den JIT nem kiralongrar pezü indang DNA osang densema kuli kakettem agütsüogo.
Additional Inspector General of Police, Counter Terrorism Department, Muhammad Tahir Rai leniba nung ISI nungi Lt Col Tanvir Ahmed nungeri iba ken o nung kulisertem indang kuli bendena parnoki iba bushisüngdang tenzük, ta National Investigation Agency (NIA) osang ajanga ashi.
Pakistan nungi JIT ya March 27 nü India-i arua liasü.
Parnoki kulisür nisung 16 indang kuli benden, parnok rongnung Punjab SP, Salwinder Singh, pa tembar Rajesh Verma aser sorochoker, Madan Gopal nunger densema lir. December 31 ayaterm nung Pathankot amakertemi par asem pua liasü.
Pakistan’er JIT-i NIA dang kiralongrar pezü- Nasir Hussain (Punjab province), Abu Bakar (Gujranwala), Umar Farooq aser Abdul Qayum (Sindh) nunger DNA meshia liasü. Ajisüaka NIA-i DNA report dang agütsü aser DNA ji par kinünger züngsemtem den medemdangang ta shiogo, ta NIA osang ka ajanga ashi.
Kiralongrar tasümang pezü nung post-mortem agir doctor tem kulia JIT-i bendenogo.