Jitendra Singh-i NE nung cancer awareness tenzüktsüogo

Shillong, April 23 (Agencies): Tanü Honibarnü North East Council (NEC) secretariat, Shillong nung Union Minister, Jitendra Singh-i cancer tashitak indang awareness aser iba tashitak nokdangtsü nükjidong nung hopta ka piyong sentong, ‘Pink Chain Cancer Campaign’ tenzüktsüogo.
NEC aser mulungtet telok, Pink Chain Campaign nati senteper ayongzükba sentong ya April 29 nü tembangtsü.
Iba sentong tenzükja Development of North Eastern Region (DoNER) Union Minister, Jitendra Singh-i, iba sentong ya Meghalaya atema dang masü saka North East tesem ajak atema lir, ta metetdaktsü.
“Tang nungi tenzüka küm ishika tsüngda iba sentong menüngdaki akümba mapang nungang iba sentong ya takok nguogo ta züngshitsü,” ta paisa ashi.
Kümtem süia arudang chiyungtsü achiba yimya aser libaliro ajanga NE nung cancer tashitak tali kümogo, ta pai ashi.
DoNER Minister-isa, northeast tesem nungi doctor tem atema Chennai nung aliba Adyar Cancer Institute nung ita trok training course atema sangdong.

Iba dak sentakba nung pai, mezüngbubaren atema doctor tembo oa January ita nungi iba course tenzükogo, aser training agir doctor tem, surgeons aser physicians indang senotsüji ministry aser institute-i agütsütsü, ta metetdaktsü.

Tang tesütiba 2014 küm osang ajanga ashiba agi, nisung lakh 1 shia nungi cancer tashitak puteter nisung 270 dak tema lir, aser linük nung cancer tashitak timba aliba district ji Aizawl lir.

Iba osang metetdakja National Cancer Institute tongti, Dr G K Rath-i, Aizawl zülen Meghalaya nung East Khasi Hills district aser Assam nung Kamrup district lir ta metetdaktsü.

Oesophagus cancer ya Meghalaya aser Assam na  nung kanga bulur aser tepok cancer ya Sikkim aser Mizoram na nung kanga bulur.