J&K Angh, Satya Pal Malik-i state tensa reprangshi

New Delhi, August 07 (Agencies): Arrla 370 agienba sülen tanü Jammu & Kashmir Angh, Satya Pal Malik-i state tensa reprangshiogo.
Bodhbarnü Raj Bhavan nung senden ka amendang Angh-i tensa reprangshiogo, ta Raj Bhawan otongdar kati metetdaktsü.
Pai ashiba agi, hospital tem nung emergency services agütsüdar, iba denji külemi nüburtemi shishilembadar aser electricity den tzü supply junga agütsüdar. Iba senden nung ketdangsertemi Angh dang state nung tensa junga lir aser tesem kecha nunga mepetmesü mesüra timtem matalok, ta metetdaktsü.
Kashmir nung Angh-i districts balala nung Deputy Commissioners dang parnok kübok staff tem dang tesem balala semdangtsü aser nüburtem nüngdak reprangteta teyari agütsütsü tuyua liasü.
Angh-isa, Kashmir nung raliwalirtem aser nüburtem timtem nung aliba reprangtetra tekaraba nung anasatiba police station mesüra magistrate dangi aotsü atema tuyutsü metetdaktsü.
Iba senden nung Angh atema Advisors- K Vijay Kumar, K Skandan aser Farooq Khan nunger den Chief Secretary, B V R Subrahmanyam nungeri shilem agia liasü.
Ano Jammu region nunga tensa reprangshitsü atema Angh-i Advisor K K Sharma nem tetuyuba agüja liasü.