J&K Assembly nung NC MLA kati Pak pusema yimyim ayim

Jammu, Tsüklai 10 (Agencies): Tanep Jammu yimti nung kiralongrartemi Sunjan army camp amakba onük nung Jammu & Kashmir assembly nung o langzütepba mapang nung opposition National Conference (NC) MLA kati Pakistan pusema yimyim ayima liasü.
Sunjwan army station amakba atema BJP MLA temi Pakistan anema yimyim ayimba mapang nung Sonawari assembly constituency nungi NC MLA, Muhammad Akbar Lone-i nokdaker Pakistan pusema yimyim ayim.
Iba dak sendakba nung NC otongdar, Junaid Mattoo-i twitter ajanga, “@JKNC_ Tiri, NC MLA dang linük ana tangatetba magizükba party ka nung dena lir ta mamadoktsüla, ta shiogo, iba den külemi MLA tenazüngzükba agidang pai Tsüngrem dang nangzükba mamadoktsüla, ta shiogo. Pai jembiba oji party-i magizüker aser aitsür,” ta metetdaktsü.
J&K Chief Minister Mehbooba Mufti-i, “Tanü kiralongrartemi Sunjwan amakba atema jashir. Yirua alirtem aser parnok kibongtem atema ni sarasademtsür,” ta lemsatep.
NC Tir aser taoba Chief Minister, Omar Abdullah-ia iba tatalokba aija, “Jammu nungi osang aser Sunjwan nung tatalokbaji kanga tejashitsüka lir. Security sepaitem aser parnok kibongtem nungi shinga timtem mataloki iba rara tembangtsü imlar,” ta metetdaktsü.