J&K Chief Minister-i Union Home Minister Rajnath Singh ajuru

New Delhi, October 18 (Agencies): Bodhbarnü New Delhi nung Jammu & Kashmir chief minister, Mehbooba Mufti-i Union home minister, Rajnath Singh ajurua senden amendang tawa Kashmir nung rara adokba densema onük aika nung o lemtepogo, ta tanü ketdangser kati metetdaktsü.
Minute 30 shi senden amenba mapang nung chief minister-i home minister dang Jammu and Kashmir tensa aser state nung tesünep alitsü atema state-i mera balala agia inyakba indang metetdaktsü.
Singh-ia Mehbooba dang state nung tesünep alitsü atema Centre sorkari akokba tashi yariteptsü ta shiogo, ta home ministry ketdangser kati ashi.
Jammu and Kashmir nung security sepaitem amakba, PDP nung inyaker ka tepsetba aser tesayur ka tepsetba onük densema jembia liasü.
Tanüa Pahalgam tesem nung security sepaitemi longkak aitertem dak injang khaloktsüdang nisung pezü tashi yiruogo.
Kasa senden nungsa Jammu & Kashmir nung International Border aser Line of Control anasa aliba nisungtemi timtem balala ajangshiba reprangshitsü atema home ministry-i study group ka tentetba indang jembi, ta kasa osang ajanga ashi.
Tawa home minister-i, security sepaitem anogoshia Jammu and Kashmir nung kiralongrar 5-6 tepseter, ta metetdakja liasü.
Bodhbarnü chief minister-isa Railway Minister, Piyush Goyal-a ajuruogo.