J&K CM Mehbooba-i by-election atema tenüng agütsüogo

Srinagar, June 01 (Agencies): Bodhbarnü Jammu & Kashmir Chief Minister, Mehbooba Mufti-i south Kashmir nung Anantnag assembly constituency by-election atema tenüng agütsüogo.

Tebu aser taoba Chief Minister, Mufti Muhammad Sayeed asüba sülen iba menden ya tazüng adoka liasü. Mehbooba Mufti yimtenren nung küm 26 alidang lai khen danga tamakok ngua mali. Tanü la tenüng agütsüdang la den Peoples Democratic Party lenirtem aika liasü.

Mehbooba Mufti ya chief minister akümba sülen ita trok tsüngda nungsa state bicameral legislature nung shimtsüla.

Iba menden atema opposition, National Conference-i Iftikhar Hussain Misgar toktepdaktsür aser Congress-i Hilal Ahmad Shah toktepdaktsür.

2014 küm assembly election nung Mehbooba tebur, Mufti Muhammad Sayeed-i Misgar madak vote tali 6,000 agi takok ngua liasü.

Tang Mehbooba Mufti ya south Kashmir Anantnag Lok Sabha constituency nungi Lok Sabha züngsem lir.

Lai taoba mapang assembly election nung asemben takok ngua lir. Lai 1996 küm Bijbehara nungi, 2002 küm Pahalgam nungi aser 2008 küm Wachi assembly constituency nungi takok ngua liasü.