J&K-i 7th pay commission mezüng tenzüker

New Delhi, Rongchii (April) 24 (Agencies): Sangtennü (Mongulbar) Jammu & Kashmir cabinet-i 7th pay commission telatetbatem agizükogo aser ibaji linük nung mezüngbuba lir.
Iba ya J&K sorkar mapa inyaker aser pensioners lakh 5 shi ka atema osang tajung lir aser parnoki tan Rongchii (April) ita nungi itasen yanglushir angutsü.
“Sorkari sangdonga aliba ama sorkar mapa jnyakertemi tan ita nungi itasen revised scales angutsü” ta J&K information & public relations department-i tanü Twitter nung metetdaktsü.
Union Cabinet-i yaküm Chiteni (July) nung seventh pay commission telatetbatem agizüka liasü.
Linük nung seventh pay commission telatetbatem agizüka mezüng mapa küma tenzükbaji Jammu & Kashmir asütsü, ta , J&K Finance Minister Altaf Bukhari-i ashi.
State nung senotsü timtem lir saka Chief Minister Mehbooba Mufti-i nangzükba sorkari akhümtsübur aser mapa küma inyaktsü, ta Bukhari-isa ashi.
7th pay commission telatetbatem mapa küma inyakba ajanga Centre-i sen crore 30,748 talila endoktsüsa akümtsü.
7th pay commission kübok sorkar mapa inyakertemi tajangzük tuluka angutsübaji house rent allowance asütsü.