J&K kübok Kishtwar nung bus lendong nung nisung 16 tsüksetogo

Srinagar (Jammu & Kashmir), Rongjui/September 14 (Agencies): Tanü Jammu & Kashmir kübok Kishtwar district nung aliba Chenab ayong nung bus tila ka tsükokba lendong nung nisung 16 asü aser nisung 11 yiruogo.
Bus nungji nisung 27 mener liasü aser iba bus ji Keshwan nungi Kishtwar-i aoba mapang Kuriya-Keshwan link road nung lendong ataloka lenküboki feet 300 shi lua ayong nungji tsükok.
Deputy Commissioner of Police (Kishtwar), Angrez Singh Rana-i, bus tsükokba sülen kümzükba maparen inyakdang lendong atalokba tesem nungji tasümang 11 ngutet, aser nisung pongubo hospital nung yaridang asü, ta metetdaktsü.
Asürtem rongnung tetsür asem aser gari anisang, Ashraf Hussain densema liasü.
Osang angazükba agi, yashi Hussain-i bus nung nisung tali mendaktsüba atema police-i pa dang senchi chir liasü.
Kümzükba maparen nung Army, police aser yimdaklirtemi yaritepa liasü.
Tesüiba ita ka tsüngda Kishtwar district nung gari lendong tulu asem atalokogo.
Iba osang angashia People’s Democratic Party tongti, Mehbooba Mufti-i asür kibongtem den mangyimba osang lemsatep.
Iba lendong nungsa yirua alir nisung 11 tayimtsü ajanga Jammu nung aliba Government Medical College & Hospital-i anir oa yaridar.
District administration-i iba lendong nung asür kibong shia nem sen lakh 5 aser yirua alir shia nem sen 50,000 agutsütsü, ta sangdongogo.