JK nung 2013 nungi gari tsükoka asüba ajak agi 2,400 jungogo

Srinagar, October 5 (Agencies): Jammu & Kashmir nung küm ana ser tesadang tsüngda gari lendong balala nung asür ajak agi nisung 2,400 dak tema jungogo aser teyirur ajak agi 21,335 lir, aser iba osang angshiba sülen state nung ketdangpurtemi iba ama lendong nungi kümzüka alitsü atema mera tasen kar agitsü nüngdaka lir ta angatettsüla.

Taküm küm tetenzük nungi July ita tashi nung gari lendong 3,221 nung nisung 506 taküm samaogo, yaküm gari lendong 5,861 atalokba nung nisung 992 süogo aser 2013 küm gari lendong 6,469 atalokba nung nisung 990 taküm samaogo, ta tanü, Hombar nü Jammu & Kashmir Assembly nung metetdaktsü.

Iba nung telangzüba agütsüdang Chief Minister Mufti Mohammad Sayeed-i, taküm küm tetenzük nungi July ita tashi nung gari lendong balala nung nisung 4,611, yaküm nisung 8,043 aser 2013 küm nisung 8,681 yiruogo, ta ashi.

Iba ama gari lendong nung tasüba atalokba ya Kashmir tenemtsüng dang nungia Jammu tesem nung timba lir. Gari lendong nung taküm küm Jammu tesem nung nisung 347, yaküm nisung 686 aser 2013 küm nisung 637 süogo.

Jammu yimti nung 2013 küm gari lendong 213, yaküm 165 aser taküm July tashi nung 77 atalokogo.

Jammu nung highway anasa aliba Samba, Kathua, Udhampur aser Ramban district tem nung küm shia iba ama lendong nung nisung 50 dak tema asür.

Kashmir nung aliba Ladakh tesem nunga gari lendong agi 2013 küm nisung 44, yaküm nisung 49 aser taküm July ita tashi nung nisung 18 süodokogo.

Gari lendong ajema akümtsü asoshi mera tasen aika agiogo, balakata Jammu aser Srinagar nung gari sadema jajatsü atema traffic rule kanga akhanga amshitsüla, ta Chief Minister-i ashi.

Pai nübur anir jajaba gari (Public Service Vehicles) anirtem shirnoki ozüng shitak mamshii gari kanga kara anir mesüra nisung tali aniba den kanga züpa anishidir, parnok meyong driving license meshia teti asoshi cancel süjang ta Regional Transport Officer/Assistant RTO tem dang metetdaktsüogo.

Tang tashi nung asür kinünger shia nem agütsüba sen 25,000, kanga mejungi yirur shia nem sen 10,000 aser tera yirur shia nem sen 5,000 agutsüba ajanga iba ama gari lendong nung asür aser yirur nem agütsüba ajak agi sen lakh 95.05 jungogo, ta Chief Minister Mufti Mohammad Sayeed-i ashi.