J&K nung AFSPA agientsüarmy-i anemer

Srinagar, Feb. 20 (Agencies): Jammu & Kashmir nung Armed Forces Special Powers Act (AFSPA) aser Disturbed Areas Act (DAA) agientsü atema inyakba anema tanü army-i, AFSPA aser DAA ji agienra security sepaitemi telungpur rara aser arrtsülen nung bendangertem litsü telungi aitba nokdangteta aliba nung timtem taliba adoktsü, ta metetdaktsügo.
Tanü Srinagar nung Western Command Investiture Ceremony tembangba sülen osangbenertem den jembidang General Officer Commanding- in-Chief (GOC-in-C), Western Command, Lt Gen K J Singh-i, “AFSPA (Armed Forces Special Powers Act) aser DAA (Distrubed Area Act) ji maneni akatsüla. Itemji maneni (J&K nung) benoktsüla,” ta ashi.
J&K nung yimtenren party kari AFSPA agientsü akhangba dak sentakba nung tasüngdangba ka langzüdang pai, “Tang tensa nung, Disturbed Areas Act ta ajatsüsa langka lir ta asenoki angatettsüla. Tensa mejungi aliba tesem ka, ibayongji idakji AFSPA benoker,” ta pai ashi.
Army Commander-i ashiba agi, tangbo arrtsülen nungi ozüng alema bendangertem litsü telungi aitba kanga ajemogo, iba den külemi telungpur rara ajema kümogo anungji iba tesem maneni azüoktettsü atema AFSPA ya maneni benoktsüla.